Mambusao, Capiz – Patay ang duha ka mga persona matapos ang nagluntad nga pagpanglabao gamit ang wasay nga ginsundan sang pagpangluthang sa Sitio Bailan, Barangay Pinay, Mambusao, Capiz mga 2:25 kahapon sang hapon.
Ginkilala ang mga biktima nga magtiyo nga sanday Antero Susa 73 anyos kag Rodrigo Cerilo, 40 anyos lunsay residente sang nasambit nga lugar.
Sa imbestigasyon sang Mambusao PNP, magkaupod nga nag-inom ang duha upod kay Ronald Cerilo nga ila man himata. May nagluntad nga indi pag-intindihanay sa tunga ni Rodrigo kag Antero rason nga nag-inaway ang mga ini apang natambagan sang ila upod nga si Ronald.
Naghigda sa duyan si Antero agud magpahuway apang lipod sa ihibalo sini, nagkuha sang wasay ang iya gumangkon nga si Rodrigo kag ginwasay ini sang makapila ka beses. Nag-angkon sang napulo ka mga pilas sa lawas kag tiil ang tiyo kun sa diin pinakapatal diri ang pilas sa dughan matapos nga nag-ungot ang wasay.
Samtang ginlagas man ni Rodrigo bitbit ang binangon ang ila upod nga si Ronald nga iya man suod nga pakaisa rasun nga nagdalagan ini pauli sa ila balay.
Pagkatapos sang pila ka minutos nakibot na lamang ang mga residente sa lugar sang makabati sila sang sunod-sunod nga nga lupok sang armas luthang kag nasapwan na lamang ang bangkay ni Rodrigo malapit sa balay ni Ronald.
Nag-angkon sa igo sang bala sa ulo si Rodrigo, nayupok ang nawong kag madamo sang mga lagob sa lawas tuga sang paglampos sa sang matig-a nga bagay.
Si Ronald ang isa sa mga ginatudlo nga suspek sa pagluthang kay Rodrigo bangud indi na makita ang iya presensya sa lugar pagkatapos sang insidente.
