Tomboy ginrape sang iya abyan, abyan nga suspek handa nga magpakasal sa biktima

2937

ILOILO CITY – Luha ang nagbulos sa kalipay sang isa ka tomboy matapos gin-alegar ginhimuslan sang lalaki nga iya man mismo childhood friend pagkatapos sang selebrasyon sa birthday party sa Brgy. Legaspi, City Proper.

Sa interview sang RMN News Team sa suspek nga si Archie Diamante, 30 anyos, ginpahayag sini nga upod man sila nga nag-inom-inom sang tomboy sa birthday party.


Sa pagdalom sang gab-i, takna alas dies ukon pasado na alas onse, mapauli na kuntani si Archie sang naghambal si alias Charice, ang iya tomboy nga abyan nga idul-ong niya ini.

Suno kay Archie nakahapit pa sila ni Charice sa isa ka ilimnan agud magdugang inom sang makahulubog nga ilimnon antes magpauli sa area sang Muelle Loney kon diin siya nagapuyo.

Pag-abot sa ila, matulog na kuntani si Archie apang luyag nga magtupad sa iya si Charice.

“Pagtapos sang ano [birthday party] te puli na kami, gindul-ong ya ko. Tapos te nagtulog na ko bala, tapos hambal ya maupod siya kuno, matulog man siya eh. Matupad siya ya sakon [ma’am]… Indi man siya hubog [Ma’am] ah… tapos amo na {ma’am} eh, natabo kami eh.

Gingapos ni Charice sang iya butkon si Archie. Sa sini nga akto, wala sang pwersa si Archie nga batu-an ang natabo gani nagbalos ini sang hakos kag gindu-ot ang iya mga bibig sa bibig sang isa. Kadungan sang pagdu-ot sang ila mga bibig, nabatyagan ni Archie ang daw nagalatay nga kuryente sa iya kaugatan nga nagadala sang kainit sa pihak sang mabugnaw nga kagab-ihon.




“Nagkupo siya sakon, ginkup-an ko man siya eh… dala kiss,” ang panaysayon ni Archie.

Ginapanginwala ni Archie nga ginhimuslan niya si Charice bangod suno sa iya gusto man sang isa ang natabo.

Pahayag pa sini nga ginkuha ni Charice ang iya drivers license.

“Wala lang ko kabalo kon nabitin siya or gusto ya guro bayran ko siya eh. ”

Base naman sa alegasyon sang pamilya ni Charice, nagadalagan samtang nagahilibion ini matapos ginhimuslan ni Archie.

Bangod sini, ginpulihan kastigo snag pamilya si Archie rason nga nagapalanakit ang iya lawas samtang nagapahunay-hunay sa karsel sang Police Precinct 1.

Nahibaluan nga may live-in partner si Charice nga babaye samtang si Archie bulag naman sa iya anay live-in partner.

Handa ang pamilya nga magpasaka sang kaso batok kay Archie samtang ginpaidalom naman sa laboratory examination si Charice agud mapat-od kon nahimuslan ini sang lalaki.

Pahayag pa ni Archie sang napakig-angutan sang RMN Iloilo, handa siya nga pakaslan si Charice bangod ginahigugma man niya ini.

“Wala man ko asawa, wala man ko nakasal… kon gusto man lang aregluhon ta ni, kon gusto sang pamilya mo pakasal, pakaslan ta ka ya,” ang mensahe ni Archie kay Charice.

Facebook Comments