Zamboanga del Sur – Nabalon pa sa iyang samad pinusilan sa Prisohan ang Top 1 Most Wanted Person sa lungsod sa Buug human kining nadakpan sa gikasa nga operasyon sa hiniusa nga pwersa tropa sa kapulisan sa Buug Municipal Police Station, Zamboanga Del Sur Police Provincial Office-Intel Branch, 903rd Maneuvering Company sa Regional Mobile Force Battalion 9 ug Kumalarang Municipal Police Station.
Gilusad ang manhunt operation sa Purok Malinawon, Brgy. Poblacion, Kumalarang, Zamboanga Del Sur pasado alas 10:30 sa kagahapon sa buntag.
Ang operasyon miresulta sa pagkasikop sa target nga si Dhats Manguda, maoy nag-una sa listahan sa mga pinangita sa balaod sa lungsod sa Buug , 38 anyos, lumulupyo sa Brgy Pulog, Buug, Zamboanga Sibugay.
Ang suspek nag-atubang sa kasong Murder nga gipagawas sa Judge, Regional Trial Court Branch 31, Imelda, Zamboanga Sibugay.
Atol sa pagdakop sa suspek misulay pa unta paglugnot dihang gihuptan sa operatiba sa 903rd Maneuvering Company hinungdan nga napusilan kini partikyular sa iyang toong bahin sa paa.
Ang dinakpan gidala sa Kumalarang Regional Health Unit alang sa medikasyon apan niining panahona gidetain na sa Kumularang Municipal Police Station Lock-up Cell.
