Zamboanga del Norte – NADAKPAN sa mga personahe sa 901st Company sa RMFB-9, Godod MPS, Intel. operatives sa 905th Company, Maritime Police Office, Cebu Intelligence Branch og Lapu-lapu City Police Office ang usa ka lalaki nga numero uno sa listahan nga most wanted sa Munisipyo sa Godod, Zamboanga del Norte pasado alas 5:00 sa miaging hapon.
Naila ang dinakpan nga si Rene Apawon, 44 anyos, minyo, usa ka PUJ driver, lumad nga taga Purok Gumamela, Barangay Situbo, Tampilisan, Zamboanga del Norte og temporararyong nagpuyo sa Barangay Mactan, Lapu-Lapu City, Cebu.
Bitbit sa mga otoridad ang warrant of arrest nga giisyu ni Presiding Judge Oscar Tomarong sa RTC 9 Branch 28, Liloy, Zamboanga del Norte, sa kasong Murder og Frustrated Murder.
Wala na nagpakita og dautang lihok si Apawon dihang nakorner sa gitagoan niini sa may Barangay Mactan, Lapu Lapu City, Cebu ug malinawong mikuyog sa mga otoridad.
