Misuway pa og ikyas ang nasikop nga gikonsiderang Top 9 sa Philippine National Police (PNP) ug Philippine Drug Enforcement Agency (PDEA) list sa pagpayuhot sa illegal nga droga ug kauban niini atol sa One-Time Big Time Checkpoint nga gipahigayon sa mga kapulisan didto sa Diversion Road, Purok-5, Brgy. Lumbo, Valencia City, Bukidnon kagahapong adlawa.
Giila ang suspetsado ang kinsa anaa puy paglapas sa RA 10591 kon Illegal Possession Of Firearms nga si Junifer Pimentel, 40 anyos, Top 9 sa PNP-PDEA list sa probinsya ug kauban niini nga si Anthony Pulao, 33 anyos ug residente sa P-21, Brgy. Dologon, Maramag, Bukidnon.
Narekober gikan sa mga suspetsado ang usa ka plastic sealed sachet nga mikontinar og drogang shabu, usa ka kalibre 45 nga armas ug duha ka unit sa keypad cellphone.
Gidala na sa Valencia City Police Station ang mga suspetsado samtang giturn-over ang mga nakompiskang ebidensya sa Crime Laboratory Office, Provincial Headquarters, Bukidnon alang sa tokmang disposasyon.
