Pasakaan ug kasong robbery karong adlawa ang duha ka mga tulisan human nadakpan sa hiniusang pwersa sa Buenavista Municipal Police Station ug 1304th City Mobile Force Company niadtong adlawng Sabado.
Giila ang mga suspek nga sila si Jayson Babato-an, 20 anyos, ulitawo ug residenti sa Purok 3, Brgy. Bonbon ning syudad sa Butuan ug si Junmar Timbal, 27 anyos, ulitawo nga residenti sa Brgy. Libertad ning syudad sa Butuan.
Migawas sa imbistigasyon nga usa ka minor de edad ug laing usa ka 18 anyos nga babaye ang nahimong biktima sa duha ka mga suspek sa dihang ilang gitoohan ug ‘toy gun’ ug malampusong nakuha ang mahalon nga cellphone.
Human sa krimen daling misibat ang mga suspek sakay sa kolor blue nga Rusi single motor apan malampuson kining nadakpan sa follow up operation sa kwerpo sa kapulisan.
