Davao City – Wala na makaabot pa sa Southern Philippines Medical Center (SPMC) ang usa ka construction worker human nakahiagom og samad pinusilan sa pipila ka parte sa lawas niini.
Igo sa liog ug likod ang mitapos sa kinabuhi ni John Christopher Abellana, 18-anyos, construction worker, ug nagpuyo sa Waling-waling St., ning dakbayan.
Nasayran nga samtang naghubog ang biktima sa dalang San Lorenzo, Buhangin kalit lang giduol sa duha ka armado ang biktima ug dayon pusil alas-10:00 kagabii.
Human sa hitabo yano ra misibat ang mga suspek busa daling gisapupo ang biktima paingon sa SPMC apan gideklara kini nga dead on arrival sa doktor nga mi-atiman kaniya.
Ang kapulisan sa Buhangin area nakarekober og tulo ka basyo sa bala sa 9mm pistol ug .45 nga pistola nga maoy gigamit sa pagpamusil sa wala maila nga mga suspek.
Padayon pa naglusad og imbestigasyon ang Presinto 5 aron maestablisar ang motibo sa krimen ug ang pagkatawo sa mga mamumuno.
RadyoMaN Joel Viray
