Nagpagawas ug kamanduan ang opisina sa Gobernador sa kagamhanang Probinsyal sa Bukidnon alang sa suspensyon sa trabaho sa tanang empleyado nga nag opisina sulod sa kapitolyo probinsyal diin kini epektibo sugod kagahapon, Agosto 6, 2020 og hangtud nga aduna na kini bag-ong pahibalo.
Kini tungod sa rason nga adunay nadawat nga taho kagahapon sa buntag gikan sa Provincial Health Office nga adunay nag positibo sa RT-PCR o swab test nga napahigayon niadtong adlaw nga Lunes, Agosto 3, 2020 mismo sa kapitolyo probinsyal.
Kini usa ka babae, empleyado sa Kagamhanang Probinsyal sa Bukidnon, nag edad og 42 anyos, minyo og lomolupyo sa Barangay Casisang, Syudad sa Malaybalay.
Ang maong babae gidala gidayon sa Northern Mindanao Wellness and Reintegration Center o NMWRC sa Barangay Casisang, Malaybalay City og gipahigayon ang dugang eksaminasyon lakip na niini ang subling pag swab test og pag pahilayo kaniya sa kadaghanan.
Basi sa inisyal nga taho ang usa ka babae asymptomatic o walay nakitang mga simtomas hangtud niining panahona.
Gisugdan na usab ang contact tracing og gi-abisohan na ang iyang pamilya alang sa pag pailalom sa home quarantine lakip na ang mga kauban sa opisina.
Gawas niana, gipahigayon na usab ang decontamination sa tanang opisina sulod sa kapitolyo aron masiguro nga dili mokuyanap ang maong sakit.
Hangtud niining panahona, wala pa mag pagawas og opisyal nga kumpirmasyon ang Department of Health o DOH Region X sa maong resulta hangtud nga mogawas ang resulta sa gihimong subling pag swab niini tungod sa nakitaan nga wala kini history of travel og walay exposure sa ubang positibong indibidwal.
Sa nahiunang pag pagawas sa balita niadtong adlaw nga Martes, Agosto 4, nagmandu na daan si Governor Jose Ma. R. Zubiri Jr. sa tanang hepe sa opisina nga magpahigayon og swab test sugod niining semanaha sa tanang 3,682 ka mga empleyado aron mahibaloan ang estado sa matag usa og mahimong andam kun ugaling adunay mataptan sa maong sakit nga COVID-19.
