Davao City-Usa sa mga highlights sa pagsaulog sa Kadayawan Fruit Harvest Festival kada tuig mao ang pagpakita sa kaanyag ug talento lakip na ang pagrepresenta sa tradisyon ug kultura sa onse ka mga tribu dinhi sa siyudad sa Davao nga gilangkoban sa mga lumad ug Moro.
Pinaagi kini sa usa ka dili ordinaryong pageant nga gitawag nga Hiyas sa Kadayawan apan lahi kini sa ubang mga beauty pageants diin dili lang kaanyag ug talento ang lantawun sa mga muhukom kundi og unsay na-ambag ug unsay mga ginapanghimo sa mga kandidata sa ilang komunidad.
Ang 11 ka mga tribu gilangkoban sa Ata, Bagobo-Tagabawa, Iranun, Ovu Manuvu, Matigsalug, Bagobo-Klata, Maranao, Sama, Kagan, Tausug, ug Maguindanaon.
Gipili sa matag tribu ang babayeng gawas sa maanyag ug talentado, duna sab kaalam sa ilang kasaysayan, nitibong kultura ug dunay kaisog nga ipasibaw ang ilang adbokasiya alang sa aspirasyon ug ginatinguha sa matag tribu.
Sumala ni Davao City Tourism Operations Office head Generose Tecson, kinahanglan nga kabalo ang mga kandidata sa ilang kultura ug tradisyon aron marepresenta nila pagtarong ang ilang tribu.
“Still the same, muses sa 11 tribes should be alam ang culture ug tradition, she should be able to represent her tribe very very well,” sigun ni Tecson.
Sa gipahigayong Cultural Presentation kun talent competition kaniadtong Agosto 15, adlawng Martes sa Gaisano Mall Bajada ning siyudad, gilingaw sa mga kandidata ang mga misaksi sa ilang gipakitang maanindot ug unique nga pagpresenta sa ilang nagkadaiyang kultura. Nasungkit ni Ainadhel Awang Blas sa Tausug Tribe ang 2nd runner-up, 1st runner-up ang pambato sa tribung Maranao nga si Sittie Haya Lanto Cairoden samtang Best in Cultural Presentation si Jenfin Puroc Aguan sa Bagobo Tagabawa Tribe.
Dugang niini, hastang lipaya sa mga katribu ni Aguan sa Bagobo Tagabawa Tribe tungod gideklara siyang Hiyas sa Kadayawan 2017 samtang Hiyas sa Panaghiusa si Jerlyn Maminto Mancia sa Kagan Tribe ug Hiyas sa Kalambuan si Gifer Joy Roldan sa Matigsalug Tribe diin gipahigayon kagabii ang coronation night sa USEP Gymnasium and Cultural Center.
Gilaumang pinaagi sa ing-aning kalihokan mas mailhan pa ug mas mapreserba ang kultura, lengguwahe ug tradisyon sa 11 sa ka mga tribu sa siyudad sa Davao.
Kasamang Renz Barbarona
