Traffic enforcers gireklamo sa usa ka batan-on

187

Midangop sa RMN DXBC Butuan ang usa ka batan-on aron ipasibaw ang reklamo batok sa tulo ka mga enforcers sa Land Transportation Traffic Management Office (LTTMO) nga midakop kaniya ug nag-impound sa gimanehung motorsiklo dungan sa alegasyon nga nawala ang 5 mil pesos nga salapi sulod sa pitaka nga nadala sa motor.
Ang nagreklamo motubag sa pangalan nga si Ronald Ucab, Jr, 25 anyus, ulitawo ug residenti sa T. Calo, brgy. Limaja ning syudad sa Butuan. Asoy ni Ucab nga nadakpan siya sa taga LTTMO diha sa Gaisano Mall sa kalapasan nga Student Permit (SP) ang iyang dala ug dili drivers license. Gi-isyuhan siya ug citation ticket apan nimando ang tulo ka mga enforcers nga i-impound ang motorsiklo.
Wala usab niya makuha ang pangalan sa traffic enforcers gumikan kay wala kini mga identification card, ug walay mga name cloth.
Ulahi na nahinumduman sa reklamanti nga nabilin ang iyang pitaka sa iyang motor hinungdan nga pagka-adlaw’ng Lunes, iyang gi-claim didto sa buhatan sa LTTMO apan daku ang iyang kahikurat human nadiskobrehan nga nawala na ang sulod sa pitaka nga 5 mil pesos nga kwarta.
Sa dihang iyang gireklamo kang PCI Peter Paul Manatad, ang hepe sa LTTMO, gihulga siya sumala pa sa opisyal nga kung adunay shabu makita sa iyang motor diha-diha gilayun siya’ng posasan – kini tungod sa iyang unang alegasyon nga gikuha sa mga enforcers ang salapi.
Sa interview ngadto kang Police Chief Inspector Peter Paul Manatad, nanghunaw kini sa giinong kwarta nga nawala.
Sumala pa ni Manatad nga dili nila batasan ang manguha ug gamit sa mga ma impound nga mga sakyanan.
Walay basihan ang maong alegasyun sa pagkahanaw sa kwarta.

Facebook Comments