Davao City – Gipasalig sa Davao City Transport and Traffic Management Office kun CTTMO ang tawhay nga dagan sa trapiko atol sa mahitabo nga Davao Regional Athletics Association 2019 nga opisyal ablihan karong adlawng Domingo, Enero 27, 2019.
Gikumpirma ni CTTMO Head Retired Police Superintendent Dionisio Abude nga plastada na ang ilang traffic plan alang sa DAVRAA 2019 diin mupakatag kini og mga personahe nga manguna sa pagdumala sa trapiko sa siyudad.
Matud ni Abude nga sa miaging adlaw nagpakatag na sila og traffic sign sa pipila ka dapit sa dakbayan partikular sa Mintal Area aron magiyahan ang mga motorista sa mga dalan nga dili pwede likoan ug parkingan aron dili maghuot ang trapiko sa Mintal area sugod karong adlaw’ng Domingo.
Segun ni Abude nga muabot sa 120 ka traffic personnel ang iyang ideploy palibot sa Sports Complex sa Mintal diin nakig-alayon na sab kini sa grupong Trafcom aron madugangan ang puwersa sa mga traffic enforcers nga mag-implementar sa hapsay nga dagan sa trapiko.
Nagpalanog daan og pahimango si Abude ngadto sa mga tricycle nga dili musuway og biyahe sa National Highway kay dili magduhaduha og dakop ang iyang mga ginsakpan sa mga malapason sa balaud sa trapiko.
RadyoMaN Joel Viray
