Muerto ensiguidas el tres miembro del familia mientras con tres otro ya lleva na hospital despues el privado tricycle que ta munta sila ya hace bangga el un van de pasajero na derechura del calsada del Manicahan del Miyercoles antede escuricia.
El maga ya muri na acto amo el man maridable canda Jakaria Sawajaan Sakandal, 35, su esposa si Berkis Sawajaan Sakandal, 33 y el diila hija si Amani Sakandal, 6.
El conquien ya lleva na hospital amo canda Patricia Sawajaan, 15, Gapol Sawajaan, 11 y si Nico Sali Gagaring, 19, todo maga residente del Campo Islam.
Asegun na report del pulis ta aparese el man familia encamino pabolbida estaba na Lubigan donde muntao estos na privado tricycle ta maneja si Jakaria.
Pero cuando ya llega estos na highway del Asinan, Manicahan derepente ya man bangga canila el van de pasajero mientras encamino para na este.
Asegun ya come el van conel camino del tricycle donde ya resulta conel mencionao accidente.
El pulis ya habla cuando yan bangga el van con el tricycle, ya buta este cuantos metro donde el maga pasajero ya man calawisic mientras el losdemas ya man ipit adentro.
Asegun porcausa con el fuersa del bangga, ya arde pa el motorsiclo pero ya puede dayun con este espaga cuando ya pasa el un water tanker na lugar.
El tsuper del van si Sayyid Mustafa Dayuday Hadjal, 30, casao del San Jose y su condoctor si Abusuhod Daming Ajibul, 29, dayun tambien ya rendi na pulis.
El cuantos pasajero tambien del van canda Ronald Andota Dumulong, 24, de Cabasalan, Reynaldo Ponjungan Asnawi, 39, Susan Ponjungan Pandita, 18, todo del Cabasalan, Zamboanga Sibugay, Khalid Yasin Sabturani,47, Rahiyan Yasin Sabturani, 10, ambos de Muti, Sharifa Yasin, 40, Junelyn Gonzales Reyes, Rajakana Kangal Majid, 42, y si Mercedita Ofendo Reyes, 36, todo de Vitali, nohay cosa ya pasa algo.
