Roxas City, Capiz – Patay ang mag-asawa nga bag-o lamang kasal matapos nga nalumos samtang yara sa ila honeymoon sa pungsod Maldives.
Suno sa report, nalumos ang mga biktima nga sanday Leomer kag Erika Joyce Lagradilla sa Dhiffushi island samtang nagapatigayon sang snorkeling.
Nahibaloan nga ang mag-high school sweetheart ang ginkasal sang nakaligad lamang nga Disyembre 18, 2018 kag nagtulak padulong sa Maldives sang Enero 9, 2019 agud nga didto i-selebrar ang ila “dream honeymoon” apang ini gali ang lugar kun sa diin matabo ang trahedya sa ila nga duha.
Base sa report sang local news agency nga RaajjeMV, una nga nalumos si Leomer kag diri gintinguhaan sang asawa nga si Erika Joyce nga siya ang buligan apang mangin ini ang dimalas man nga nalumos.
Gindala pa sa ospital ang duha apang gindeklarar nga dead-on-arrival.
Suno kay Foreign Affairs Assistant Secretary Elmer Cato, ginmandoan na ang Philippine Embassy sa Dhaka nga amu ang may huridiksyon sa Maldives nga makig-angut sa mga otoridad para sa repatriation sang bangkay sang duha.
Nagakinahanglan sang kapin sa P1,268,000 pesos nga kantidad para nga madala pabalik sa Pilipinas ang bangkay sang mga ini.
