Davao City – Bisan pa man tuod sa gitawag nga ‘triple whammy’ nga baguhay pa lamang nato nasinatian partikularmente ang Bagyong ‘Urduja,’ ‘Vinta’ ug NCCC Mall Tragedy, malaumon sa gihapon ang Pilipino nga mulahutay taliwala ning maong mga hagit ug suliran.
Matud ni Ateneo de Davao University (ADDU) Assistant Philosophy professor Dr. Christopher Ryan Maboloc sa pakighinabi kaniya sa tulumanong ‘Straight to the Point’ uban ni RadyoMan June Duterte, ang maong mga insidente naghatag kanato ug pasakit apan daghan usab kining gibilin nga mga leksyon kun pagtulun-an sa kinabuhi.
Matud sa professor, matawag nato nga ‘force of nature’ kun ‘force majeure’ ang mga bagyong nilampornas kanato ngari ug ang dakung sunog sa iladong mall sa Davao usaka panghitabo nga walay gustong mahitabo kini.
Apan ning tulo ka mga mapait nga insidente, nagpakita lamang kini nga adunay tulubangon ang tawo diha sa pag-abusar sa atong kinaiyahan ingon man pagpabaya sa mga lagda sa balaud sama sa safeguards kontra kalamidad.
Matuod nga daw adunay kausaban sa porma sa pag-selebrar sa katawhan sa Kapaskuhan apan ang dili gayud mausab sa panahon ug sa modernisasyon mao ang matuod nga diwa niini nga gugma sa Diyos alang sa katawhan.
Gidugang usab sa academician nga gumikan dili nato makontra ang modernong impluwensiya sa atong mga tradisyon ug selebrasyon, mas bililhon nga kontrahon na lamang nato ang negatibong kinaiya sa tawo sama sa ‘selfishness’ ug ‘greed’ nga maoy makababag sa kalamboan sa atong sosyedad.
Gumikan kay ang Pilipino ilado sa iyang pagka-maisogong mobarug kontra sa tanang mga hagit ug hulga sa atong seguridad, kampante ug malaumon si Maboloc nga maka-survive ug makalahutay gihapon kita sa tanang mga pagsulay.
RadyoMaN Jason Amisola
