Davao City – Gipasigarbo karon ni Barangay Captain Rolando Trajera sa Barangay 76-A Bocana ang ubos nga ihap sa COVID-19 sa ilang barangay.
Segun ni Trajera, mogawas nga lima lamang ang kaso sa COVID-19 sa ilang barangay diin ang duha nga una nang nag-positibo, paspas nga naka-recover samtang ang tulo ka mga boarders negatibo na usab sa maong balatian.
Matud ni Trajera, sekreto nila mao ang paghatag og dakung responsibilidad sa iyang katawhan diha sa pagpartisipar sa kampanya kontra sa virus.
Luyo sa daku nga populasyon sa barangay, natala ang ubos kaayo nga kaso sa COVID-19 bunga sa pagtinabangay sa mga residente sa pagsita sa mga tawong gahi’g ulo, pagsita sa mga tawo nga mosulay og sulod ug ang mga ginikanan kinsa hugot nga nagapamadlong sa ilang mga anak.
Sumala ni Trajera, matag karon ug unya nagapahigayon usab sila og recorida aron awhagon ang katawhan nga tumanon gayud ang tanang mga palisiya kon control measures batok COVID-19.
Matud sa maong opisyal, gikahibulong nila’g daku nganong nahilakip ang ilang dapit sa gitawag nga ‘Very High Risk’ area luyo sa mga maayong katikaran diha sa pakigbatok sa virus.
Hinoon, mapasalamaton gihapon ang kapitan tungod kay oportunidad usab kini aron mas mapakusgan pa ang kampanya kontra pandemic ug masumpo ang pagsulod sa virus sa barangay.
Sumada total, walay pagsupak si Trajera nga ipailawom sa barangay lockdown or barangay ECQ ang ilang dapit.
Bisan pa man kon negatibo na sa COVID-19 ang Barangay 76-A, gilakip gihapon sa high risk category ang maong lugar hatud sa pipila ka mga residente nga nagpakita og simptomas sa sakit.
Dugang ni Trajera nga ila na karong gipakusgan ang kampanya ingon man mga counter measures diin mas gi-istriktohan pa nila ang pagsuot og mandatory facemask, social & physical distancing ug uban pa aron dili na masubli nga adunay maigo nga mga residente sa COVID-19.
RadyoMaN Joel Viray
