Davao City- Gikalipay sa Southeastern Mindanao Diversified Driver Operators Cooperative ang implementasyon sa citation ticket dinhi sa syudad sa Dabaw sugod kagahapong adlawa.
Sumala ni SEMDOCC President Maning Duran nga dakong tabang sa mga PUJ Drivers ang citation ticket tungod mapakusgan na ang pagpatuman sa mga balaod trapiko sama sa Anti-Jaywalking ordinance.
Giangkon ni Duran nga hagbay ra naglabad ang ulo sa mga PUJ Drivers sa mga commuter nga magpa-taka og labang bisan og wala sa pedestrian lane hinungdan sa disgrasya ug pagkasikop sa mga drivers.
Segun ni Duran nga mas gusto nila ang citation ticket itandi sa temporary operator’s permit sa LTO nga gawas dako ang multa, kumpiskahon pa gyod ang ilang mga driver’s license.
Positibo si Duran nga hingpit madisiplina ang mga drivers ug ang mga pasahero diha sa pagsunod sa mga balaod trapiko karon nga nagpatuman ang CTTMO og citation ticket nga may tugbang nga multa depende sa violation.
Malaumon pa ang SEMDOCC President nga buhaton ni CTTMO Chief Dionisio Abude ang iyang panganti nga walay paglurang ang ilang pagpatuman sa citation ticket ug i-implementar kini dili lamang sa unang semana apan sa tanang panahon hangtud mabatasan sa mga drivers ug sa mga commuters ang pagsunod sa balaod trapiko.
Kasamang Joel Viray
