Davao City- Gidunggab patay ang usa ka traysikad driver human nakaangkon og daghang samad dinunggaban sa iyang lawas alas 2:00 sa hapon natigayon sa Brgy. 16-B ning dakbayan.
Subay sa report gikan sa Sta. Ana PNP naila ang biktima usa ka Ronald Alberca, 33 anyos, residente sa nasampit nga lugar samtang ang suspetsado ginganlang Welliam Ramos, 50 anyos, nagpuyo sa Quary Brgy. Ma-a Diversion Road ning siyudad.
Matud pa, nakadawat nalang og impormasyon ang inahan sa biktima nga si Alice Alberca gikan sa mga opisyal sa nahisgutang barangay nga gidunggab ang iyang anak ug gidala sa Southern Philippines Medical Center apan gideklara sa attending physician nga dead on arrival kini.
Hinungdan nagpakitabang ang inahan ug daling girespondehan sa mga pulis sa Sta. Ana PNP nga miresulta sa pagkasikop sa suspetsado.
Ang suspetsado balhug na sa selda sa Sta. Ana PNP ug gihikay na ang kasong pagpatay batok sa suspek ug karon adlawa i-file ang kaso ngadto sa korte.
Sa imbestigasyon sa kapulisan sa Sta. Ana PNP matud pa nga walay igong motibo sa pagdunggab sa biktima ug posible nga natripan lamang sa suspek nga hubog.
RadyoMan Don Pulayao
