Polomolok, South Cotabato—Gipaundang na ni Polomolok, Barangay Poblacion, Kapitan Jesse Bontuyan ang gikaingong treasure hunting operation nga nahimutang sa Purok San Agustin sa maong Barangay nga una nang gireklamo sa iyang buhatan.
Nasayran nga nakadawat ug report si Kapitan Bontuyan gikan mismo sa purok chairman sa maong purok nga si Dema Demadaria bahin sa lawom kaayo nga kalot sa yuta kansa gidudahang treasure hunting operation nga gipanag-iyahan sa usa ka Arsimio Tiangson.
Sumala ni Bontuyan nga nabalaka na si purok Chairman Demadaria tungod lawom na kaayu ang nakalot ug siya nahadlok nga basin ug matumpag ug ma-apektohan ang mga panimalay nga anaa sa palibot niini.
Gi-inspection na usab sa mga personahe sa Municipal Environment And Natural Resources ang lugar ug gipahimangnuan ang nanang-iya nga undangon ang operasyon tungod posible silang kasuhan kung mapamatud-ang treasure hunting ang ilang gihimo.
Dungan sa inspection, gikumpiska sa MENRO ang mga himan nga gigamit sa pagkalot sa luna.
Sa interview sa RMN Gensan News Team ngadto kang Efren Lapinid, Menro Enforcer, iyang gibutyag nga personal nga nahidangat sa ilang buhatan ang nanag-iya sa luna aron ipaklaro nga dili treasure hunting operation ang ilang gihimo inay himuon nila kining deep well aron duna silay kakuhaan ug tubig.
Apan sa gilawmon sa kalot dili motuo si Lapinid sa eksplenasyon sa tag-iya sa luna mao nga ila nalang kining gipahimangnuan nga undangan na ang pagkalot sa lugar.(DS)
