President Roxas, Capiz- Isa ka tree planting activity ang ginpatigayon sang Office of the Vice Mayor sang President Roxas, Capiz sa pagpamuno ni VM Edvil Jhon Alfaro katuwang ang United Fraternity and Sorority of President Roxas subong nga adlaw sang Sabado, Disyembre 26, 2020.
Ang amo nga aktibidad nga gintig-ulohan BINHI “Ikaw kag Ako ang Bag-o nga Binhi para sa Buasdamlag sang Aton Banwa” ang ginpatigayon sa Barangay Carmencita, President Roxas, Capiz.
Target man sang grupo nga magtanum sang nanari-sari nga klase sang puno sang kahoy kag mga fruit bearing trees sa iban pa nga mga kabarangayan sa amu nga banwa.
Katuyoan sang amu nga lihuk nga makabulig sa programa sang gobyerno agud nga malikawan ang pagluntad sang flash floods nga posible tunaan sang pagkadula sang kabuhi, pagkasamad sang mga imprastraktura, poluy-an kag pag-evacuate sang mga residente sa tiun sang pagbu-bo sang mabaskog nga ulan.
Madumdoman sang mga nakaligad, naka-eksperiensya sang malapnagon nga pagbaha ang pila ka kabarangayan sang President Roxas nga nagresulta sang pag-evacuate sang madamo nga pamilya samtang may yara man snag ginbawian sang kabuhi.
