Tricycle driver patay matapos luthangon sang riding in tandem sa banwa sang polomolok.

Isa na naman ka insidente sang pagpangluthang ang nagluntad sa banwa sang Polomolok sa diin patay ang isa ka tricycle driver matapos nga luthangon sang riding in tandem sa Cannery road Cor. Blk. 1, Docci Village, Brgy. Poblacion sa nasambit nga banwa alas 8:49 kahapon sang aga.
Ginkilala ang biktima kay Roger Domabildo, 38-anyos, may-asawa kag residente sang Prk. Peoples Village, Cannery Site sa nasambit nga banwa.
Nakaangkon naman sang isa ka igo sang bala sang kalibre 45 nga armas luthang ang biktima nga nangin tunaan sang iya hinali nga kamatayon.
Base sa ila imbestigasyon suno kay Psi Romeo Albano Chief Investigator sang Polomolok Pnp nagapamasahero ang biktima kag pag-abot sa lugar hinali na lang ini nga ginluthang sang mga suspek.
May-angot sini suno kay Psi Albano ginpahigad na nila ang anggulo nga may kahilabtanan sa iligal nga droga ang motibo sa pagpatay sa biktima tungod wala man ini sang criminal record kag sa ila drug watchlist.
Sa subong personal grudge suno pa ang ila ginalantaw nga motibo sa pagluthang patay sa biktima kag nagapadayon pa ang ila nga imbestigasyon sa nasambit nga insidente suno kay Albano.