Panit-an, Capiz- Narekober na ang traysikol nga una nareport nadula samtang nakaparking sa Pavia Street Brgy IX syudad sang Roxas pasado alas dose sang aga.
Ini matapos nga nagpalab-ot sang mensahe sa RMN-Roxas ang Principal sang Timpas Elementary School nga si Mr. Jimmy Aspera nga may yara sang gin-abandonar nga traysikol sa provincial road sa may bahin sang Brgy. Timpas, Panit-an, Capiz
Suno diri nga mga pasado ala 1:00 sang kaaganhon, may nakit-an ang isa sa mga residente nga malapit sa lugar nga tatlo ka tawo nga nagatulod sang traysikol. Ginapatihan nga nahubsan sang gasolina ang tangke sini gani nga ginbilin na lamang sang mga suspek.
Una diri, personal nga nagpadulong sa stasyon sang dyVR RMN-Roxas ang tag-iya sang amo nga motorsiklo agud nga idangop ang pagkadula sang traysikol nga iya lamang ginbilin sa guha sang peso net nga ginapanag-iyahan sang iya utod sa Pavia Street, Roxas City
Nagapadayon naman ang imbestigasyon sang Roxas City PNP agud hibaluon ang identity sang mga suspek. Samtang nabalik na sa tag-iya nga si Hernan Dedulo, 22-anyos sang Brgy. Banica, Roxas City
