Cauayan City – Nasawi ang isang lalaki habang sugatan naman ang isa pa matapos sumalpok ang kanilang sinasakyang tricycle sa trailer truck bandang alas dos ng madaling araw ngayong ika-30 ng Oktubre sa Brgy. San Fermin, Cauayan City, Isabela.
Ang nasawi ay kinilalang si Jun Baddungon, 42 anyos, habang ang sugatang pasahero naman nito ay kinilalang si Marcelo Baddungon, 44 anyos, parehong residente ng Brgy. Turod Reina Mercedes, Isabela.
Sa nakuhang impormasyon ng IFM News Team sa Cauayan City Police Station, binabaybay ng tricycle at ng trailer truck ang magkasalungat na direksyon at nang makarating sa pinangyarihan ng insidente partikular na malapit sa Happy Box, bigla umanong nag-overtake si Baddungon sa isa pang tricycle na nasa unahan nito dahilan upang sumalpok sa noon ay paparating naman na Trailer Truck.
Dahil sa lakas ng pagkakabangga, nagtamo ng malalang pinsala sa iba’t-ibang bahagi ng kanilang katawan ang driver ng tricycle at ang pasahero na naging dahilan ng pagkasawi ng driver na si Jun Baddungon.
Samantala, nasa kustodiya na ngayon ng Cauayan City Police Station ang driver ng trailer truck para sa kaukulang dokumentasyon.
