iFM Laoag – Nasugsugatan ti maysa a tricycle driver iti Brgy. Capasan iti ili ti Dingras iti pannakasapgudna iti maysa a kotse idi malem kalman Enero 1, 2020.
Nabigbig ti biktima a ni Mr. Rufo Balais Sr., agtawen pitupulo ket maysa, naasawaan, maysa a tricycle driver ken residente ti Brgy. Bacsil iti ili ti Dingras idin to nga iti nakasapgud kenkuana a nangiturong ti kotse ket ni Mr. Mark Johnson Hipolito, agtawen duapulo ket dua, awanan ti asawa, ken residente iti Brgy. Barcelona iti ili ti Solsona.
Segun kenni Police Corporal Jhoanna Deus, imbestigador iti daytoy a kaso, awan pay ti nagsaritaan dagiti agsinnumbangir a kampo agsipud ta dumalan paylaeng ti medikasion ken x-ray ni Balais.
Innayun ti opisial a posible a maipila ti reckless imprudence resulting to damage to property ken physical injury ni Hipolito nu agipila iti reklamo ti biktima.
Kabayatanna, basar iti imbestigasion, napasamak daytoy a disgrasia gapu iti pannakabettak ti akin kannawan a ligay ti kotse a naawanan ti control iti driver a ni Hipolito isu nga iti daytoy nasapgud na iti tricycle ken nakasugatan iti akin kannawan a saka ni Balais nga insigida met a Naitaray iti Dingras Hospital, idin to nga ti driver iti kotse ken dagiti kakadwa na ket saan met a naanano.
Nagtalinaed met iti kustodiar ti PNP Dingras dagiti dua a behikulo a karaman iti daytoy a pasamak ken manarimaan paylaeng ti naan anay nga imbestigasion. (Joe Anne Agustin)
