Davao City – Human gibakwi ni Pres. Rodrigo Duterte ang amnestiya ni Senador Antonio ‘Sonny’ Trillanes IV pinaagi sa Proclamation No. 572 kagahapon adlawa, tino nga mahimo karon nga dakung diskusyon sa mga abogado ug sa mga batid sa balaud ang legalidad sa pagdeklara nga ‘void ab initio’ ang amnesty ni Trillanes.
Si Trillanes, gipreso tungod sa Oakwood mutiny niadtong 2003 ug Manila Peninsula Siege niadtong 2007 sa panahon sa administrasyon ni former Pres. Gloria Arroyo.
Apan si ex-president Benigno Simeon Aquino III naghatag og amnestiya kang Trillanes buwan sa Disyembre 2010 human sa pila ka tuig nga pagkabilanggo.
Gi-supersede sa Proclamation #572 ang unang Proclamation #50 ni Aquino human mipabor ang Kongreso sa amnestiya kang Trillanes.
Si Trillanes nag-ingon nga kun nahatagan man siya og amnestiya kana tungod nag-aplay siya niini dihang si Aquinopa ang anaa sa gahum.
Busa gibarugan niini nga walay legal nga basehan ang pagbasura sa amnesty sanglit gikinahanglan muagi sa Kongreso kung bakwion man ang mao nga pribilehiyo.
Si Sen. Franklin Drilon mipabor usab sa giingon ni Trillanes kansang lakang ni Duterte dilikado matud pa sa bahin sa iyang kaalyado.
Apan si DOJ Secretary Menardo Guevarra mibaliko sa punto ni Drilon sanglit kuwang sa rekwisitos si Trillaness aron maka-avail sa amnestiya busa sa sinugdanan pa lang wala na kini’y basehan.
Ang section 5, 6, ug 11 sa DND Amnesty Committee Circular No.1 2010 nag-obliga kang Trillanes sa pag-angkon nga guilty kini sa Oakwood Mutiny ug Manila Peninsula Siege aron maangkon ang amnesty.
Apan walay nasayran nga gihimong pag-angkon si Trillanes sa iyang mga kasong giatubang aron makwalipikar kini sa amnesty program sa gobyerno
Si Ateneo De Davao University Political Science Professor Ramon Beleno aduna’y nakita nga buslot sa kamandoan ni Duterte ngadto sa kapulisan ug militar nga dakpon pag-usab si Trillanes.
Suma ni Beleno, bugtong ang korte lamang adunay kagahom sa pagmando sa mga otoridad aron dakpon si Trillanes ug dili ang executive branch.
Ma’y posibilidad nga gamiton kini nga buslot aron kwestiyonon sa kampo ni Trillanes ang legalidad sa diriktiba ni Pangulong Duterte pag-abot sa korte suprema.
Sigun pa ni Professor Beleno nga bisan og ipaagi sa court martial si Trillanes apan korte ra gihapon ang dunay kagahom sa pagpasikop.
Hinoon dili pa tin-aw sa karon kung unsay mahimong kaugmaon sa senador karon nga subling giablihan ang mga kasong kriminal ug administratibo batok kaniya.
Dugang sa Political Science Professor nga ang nadangatan ni Trillanes trataron unya kini sa mga kaalyado nga politikanhong paglutos nunot sa iyang pagka-kritiko sa administrasyong duterte.
Si Professor Beleno wala na nagbutyag kun supak ba kini sa lakang sa gobyerno karon inay misulti kini nga mas maayo paaboton na lang ang sunod nga mahitabo sa kumbanti sa administrasyon ug oposisyon.
RadyoMaN Joel Viray
