Tropa nagsugyot sa gobyerno nga hatagan og diskwento ang mga media diha sa pagproseso sa paghupot ug armas

Giawhag sa Tri Media Organization for Peace and Alliance in Mindanao (TROPA) ang Philippine National Police ug Armed Forces Of the Philippines nga subling ipailalom ang mga media practitioner sa Security Protocol Orientation human lain na usab nga radio announcer ang gipusil patay sa Calamba, Misamis Occidental.

Sumala ni Manny Autida, pangulo sa TROPA Mindanao nga angay mapahinumdom pag usab sa mga membro sa media ang mga talamdan sa seguridad aron dili daling targeton sa mga armado nga adunay dautang tinguha sa usa ka media practitioner.

Matud ni Autida nga mas labing maayo nga maghupot ug legal nga armas ang mga media practitioner aron aduna kini ikapangdepensa panahon nga maka-engkwentro ang tawong nag interes sa iyang kinabuhi.

Giawhag ni Autida ang gobyerno nga hatagan ug special nga pribelilhiyo ang mga media practitioner sama sa paghatag ug diskwento diha sa pagproseso sa mga rekisitos ilabina diha sa presyo sa mga pusil nga karong panahona labihang taasa.

Gidugang niini nga makusganon ang pagkondena sa TROPA sa gidangatan ni Juan Jomalon aka DJ Jhonny Walker kansang gipusil patay samtang nagprogram sulod sa sibyahanan ingun man ang panawagan sa mga otoridad nga sikopon ang mga responsabli sa mas daling panahon.

RadyoMaN Erin Lumosbog