Davao City – Biktima ang usa ka truck helper nga lalaki human gidunggab sa laing truck helper natigayon alas-4:00 sa hapon sa may Pax Compound, Km. 14, Panacan, siyudad sa Davao.
Sa report gikan sa Sasa PNP, naila ang biktima nga usa ka Gerald Agustin, 22-anyos, ulitawo, truck helper, ug residente sa Brgy. Salangsang, Lebak, Sultan Kudarat, samtang ang suspek kauban ra sa biktima nga usa gihapon ka truck helper nailang si Marjorie Cumapon, 18 anyos, nagpuyo sa San Vicente Lupon, Davao Oriental.
Atol sa imbestigasyon sa kapolisan, nasayran nga matud pa samtang nagbaktas sulod sa maong compound padulong sa ilang sakyanan nga giparada sa DBCOM parking area ang biktima kauban ang iyang upat ka mga katrabaho nakit-an sa biktima ang supect ug iyang giduol sa tuyo nga alegrohon ang ilang panagbingkil apan kalit hinuon gidunggab ang biktima tumong sa iyang walang bahin sa tiyan diin daling daling miikyas ang suspect padulong sa hilit nga lugar.
Daling gidala sa Southern Philippines Medical Center (SPMC) ang biktima aron matambalan samtang naglusad na og follow-up operation ang kapolisan Sasa Pnp alang sa pagsikop sa suspetsado nga midunggab sa biktima.
Samtang dead on arrival ang usa ka Britist National human nahidangat sa Holy Spirit Hospital sa may Sampaguita St., Brgy. Mintal, Tugbok district ning siyudad alas-2:45 sa hapon.
Sa report gikan sa Tugbok Police Station naila ang biktima nga usa ka Norman Clive Gurney, 69 anyos, nagpuyo sa Deca Homes Brgy. Tacunan, Tugbok district ning siyudad.
Sa imbestigasyon sa kapolisan, nasayran nga walay foul play ang kamatayon sa biktima ug nasuta nga dunay gihambing nga balatian ug nakasinati sa sakit nga pneumonia niadtong milabay’ng semana.
Ang patay nga lawas sa langyaw anaa gidala ug gihaya didto sa St. Peter Funeral Homes sa Calinan ning dakbayan.
RadyoMaN Don Pulayao
