Un truck man del un flower shop quien alegaomente ya queda malo el cabesa el ya anda sindi con el casa del su amo y despues ya comete el suicidio pormedio de salta na fuego hasta ya muri le, na Guiwan enantes tarde.
Base na report del bumbero y del pulis, si untal Tam-Tam Abella, truck man del un flower shop derepente este ya arma su cuerpo de sanggut y hilamon y despues ya abre el piton del gasul y ya sindi este hasta ya queda grande el fuego adentro del casa del su amo el familia Enriquez, na Guiwan highway pasada alas 4 del tarde.
Asegun por el miedo del otro maga trabahnte del familia Enriquez ya entabla estos pa afuera del casa.
Asegun con canda Leonora Dalaygun el labandera del familia y su esposo si Leonardo el truck driver del shop, ya mira pa sila con Abella cuando ya sindi este con el gasul y hasta ya queda bien grande el fuego y ya lambe na entero casa.
El yerno del familia Enriquez si Manuel Bernardo ya sostene quemadura na detras del cuerpo donde mismo pa si Abella el ya ayuda conele para puede le man taclas na corral de cemento y ya salva su vida.
Asegun el maga besinos ya precura pa convinci con Abella para subi tambien na corral de cemento para salva su cuerpo pero nohay este comporma y envez na cara-cara del maga gente ya salta este na medio’y fuego hasta ya man carbon desuyu cuerpo na calor del fuego dolomismo na impierno.
Pero antede muri si Abella, ya puede pa captura na cell phone video del otro pariente del familia Enriquez, cargando pa le con un sanggut y hilamon ta llama con el maga gente afuera y dolomismo ta cumbida entra adentro del casa que ta quema y despues ya serra este con el gate.
Nohay idea el familia Enriquez y otro maga trabahante si porque si Abella ya comete con el mencionao acto.
