Tsunami Drill gipahigayon sa Sarangani Province

15

Sarangani Province—-Anaa sa dos mil kinyentos (2,500) ka mga residente sa Barangay Poblacion sakop sa lungsod sa Kiamba ang nipartisipar bag-uhay lang sa gipahigayon nga Tsunami Drill, gi-organisa sa Office of Civil Defense kon O.C.D. Region 12, Sarangani Provincial Disaster Risk Reduction and Management Office, Kiamba Municipal Disaster Risk Reduction and Management Office, og Poblacion Barangay Council, katugbang ang nagkadaiyang kahugpungan sama sa Kabalikat og Karancho og mga purok leaders og ang Kiamba Bureau of Fire Protection.

Segun ni Robert Lubonting, operations officer sa PDRRMO Sarangani, gidayig sa mga evaluator gikan sa OCD og sa Philippine Institute of Volcanology and Seismology o PhilVolcs ang kinatibuk-ang resulta bisan pa kalit nga nibundak ang ulan. Og naglaum kini nga karong adlaw nga Byernes, Nobyembre dise-syete (17) susamang kalagsik ang ipakita sa mga katawhan sa Barangay Poblacion sa Glan, ang sunod nga magpahigayon og tsunami drill.

Kinahanglan lang nga i-improve sa Poblacion, Kiamba ang pagdasig sa tanang lumulupyo niini hilabi na ang mga namuyo sa kabaybayunan nga apilan ang mga tsunami drill, og nga pakusgan pa ang alert warning system, kanang kusog nga siren gikan sa kabomberohan aron dungan nga madunggan sa mga tao una pa mudagan padulong sa evacuation center.

Dos hangtud tres kilometros (2-3 kms) gikan sa baybayon ang gikonsidera nga luwas kabalhinan kung adunay tsunami.

Nagpahimangno si Rommel Sinarimbo, ang deputy for operation sa Office of Civil Defense, nga kung masinatian ang usa ka makusog nga linog, hilabi na ang 7.2 magnitude, dili dayon mudagan samtang gauyog ang yuta tungod kay matumba ra, inay magkinalmahon og ipatuman dayon sa kaugalingon ang “Duck, Cover and Hold” aron ma-safety sa unsa mang mangahulog nga butang. Kung madunggan ang usa ka minuto nga lanog nga siren, mag-duck, cover and hold usa, og kung madunggan na ang putol-putol nga siren, buot pasabot panahon na para mudagan sa tsunami evacuation area. (news from: Governor’s Office of Sarangani Province)

Facebook Comments