Davao City – Nagtoo ang Trade Union Congress of the Philippines nga desperado na kaayo ang sekyu nga si Alchie Paray maong nahimo niini ang pang-hostage og mga tawo sud sa usa ka mall sa San Juan City, Manila.
Matud sa TUCP, nanghinobrang pangabuso, dili maayo nga sweldo ug mga benepisyo sa security agency ang nagtukmod kang Paray aron himoon ang maong krimen.
Suma sa spokesperson nga si Alan Tanjunsay, hulagway si Paray sa kahimtang sa daghang trabahante sa Pilipinas kansang naabuso ang ilang katungod sa panarbaho sa mga kumpanya nga ilang gialagaran.
Sa nahitabo kang Paray, walay laing mabasol niining tanan ang mga ahensiya ra sa gobyerno kay kung gibuhat lang unta nila ang ilang trabaho wala unta musangko sa paghimo og krimen ang maong sekyu.
Gikundina ni Tanjunsay ang pang-hostage nga gibuhat ni Paray apan sa kinaladman sa iyang kasingkasing naghari pa gihapon ang tumang kaluoy hinungdan nga dili niini basulon si SG Paray.
Alang ni Tanjunsay, hangtud walay kausaban ang mga ahensiya sa kagamhanan daghan pa unyang mga trabahante nga dunay susamang mulo ang musunod sa yapak ni Paray pag-abot sa tukmang panahon.
RadyoMaN Joel Viray
