Davao City – Dakpan sa kapolisan sa Talomo ang usa ka 18 anyos nga lalaki human kini nanulis sa usa ka tawo adlaw’ng Dominggo sa kagabhion.
Sa rekord nga nahipos sa Talomo PNP nga ang biktima nagpaila nga si Apolinar Estandarte Flores, 39 anyos, residente sa may San Miguel Brgy. Catalunan Grande ning siyudad.
Sumala pa nga nag-inum ang biktima sa may Bonguyan beach resort sa Matina Aplaya alas 7:00 sa gabii atong adlawa diin kalit siya gibira sa tulo ka mga suspek nga dunay dalang mga mahait nga hinagiban ug mideklara nga tulis ngadto kaniya.
Nasakmit sa mga suspek ang iyang kwarta nga adunay kantidad 1,400 ka pesos.
Human sa panghitabo nangayo og assitance ang biktima ngadto sa kapolisan sa Talomo dayon gilusad ang manhunt operation sa may Dumalag, Matina Aplaya.
Malampuson nga nasikop ang usa sa mga suspek nga mitago sa usa ka taxi sa nahisgutan nga lugar ug giila kini nga si Jogs Flores, 18 anyos, walay trabaho, ug residente sa may Dumalag Matina Aplya ning siyudad.
Sa kasamtangan, gikustodiya na una sa buhatan sa Talomo PNP ug ginaplastar ang tukmang kaso ngadto sa suspek.
RadyoMaN Paul Canono
