Patay ang usa ka tulisan atol sa gihimong hot pursuit operation sa kapulisan sa Valencia City, Bukidnon kagahapon sa kadlawon.
Ang wala pa mailang suspect usa ka dakong lalaki, gibana-banang naa sa 25 hangtud 30 anyos, 5’9″ – 6’0″ ang kataas, nagsuot sa itom nga jacket, grey sweat shirt, jeans ug naa karon sa Lao-as Funeral Home.
Matud ni Police Lieutenant Colonel Surki Sereñas, Hepe sa Valencia City Police Station nga mga ala 1:20 kagahapon sa kadlawon nagpakitabang sa kapulisan ang duha ka empleyado sa Frontrow Direct Selling Company sa Valencia City nga gitulis sila sa usa suspect sa Bonifacio Street, Valencia City.
Human nakareport ang duha ka biktima nga silang Perly Larian ug Alejane Mijarse daling mihimo sa operasyon ang mga pulis ug nakita sa lugar ang suspect.
Sa dihang nakamatikod sa mga pulis, daling miikyas ang suspect sakay sa motorsiklo apan gipusil ang mga niresponding mga pulis.
Padayon nga gilakag sa pulis ang suspect ug naigo sa bala pag-abot sa Barangay San Carlos.
Gidala pa sa mga pulis sa La Viñas General Hospital ang suspect apan gideklarang dead on arrival.
Nakuha sa crime scene ang duha ka 9mm FCC; usa ka cal. 45 Remington 1911A Pistol, usa ka cal. 45 magazine; lima ka cal. 45 cartridges; usa ka cal. 45 cartridge chamber loaded; usa ka cal. 45 FCC; usa ka SUZUKI Raider 150 motorcycle nga walay plaka, lain-laing personal items gikan sa mga biktima sa tulis, kwarta ug uban pang importanteng butang ug usa ka sachet sa shabu.
