Davao City – Nisiaw na usab ang mga kawatan partikular sa area of responsibility San Pedro PNP sulod lamang sa usa ka adlaw diin adunay tulo ka mga complainant human nabiktima sa kawat.
Subay sa report gikan San Pedro PNP, unang nabiktima sa kawat usa ka estudyante nga Indian national nga si Kaveri Ashwathi, 20 anyos, kasamtangang nagpuyo sa may 88 Topas St., Marfori Heights ning dakbayan sa Davao.
Matud pa samtang nakamata ang complainant alas 10:00 sa buntag, iya nalang nadiskubrehan nga nahanaw na ang iyang laptop nga mukantidad og P45,000 lakip ang cash nga 2,000.00 pesos hinungdan nga nagpatabang sa kapolisan.
Ikaduhang nabiktima sa kawat mao si Mervin Gamez, 42 anyos, nagpuyo sa may Baliok Toril kinsa nakawatan og iPhone alas 11:00 sa buntag nga mukantidad og P30,000 sa duha ka wala mailhing mga suspek sakay sa usa ka single motorcycle nahitabo sa may dalang Palma Gil.
Samtang laing usa ka biktima sa kawat ang nidangop sa kapolisan sa San Pedro nga si Sheryl Agustin, 21 anyos, netibo nga taga-Alyusan, North Cotabao, nagpuyo sa may Trading Boulevard kinsa nakawatan og cellphone alas 5:30 sa buntag nga nagkantidad og P8,000 lakip ang cash nga P2,000 pesos ug personal nga mga identification cards.
Mokabat matud pa sa P90,000 ang kantidad sa gipangkawat sa mga wala mailhing suspetsado gani mas gipahugtan na karon sa kapulisan ang pagbantay sa ilang area of responsibility kalabutan sa sunod-sunod nga pagpangawat.
RadyoMaN Don Pulayao
