Tampakan, South Cotabato–Temporaryong nakagawas gikan sa kustodiya sa Tampakan Police Station ang tulo ka mga personahe nga silang Herbert Demos, 46 anyos, residente Sa Botanic Compound Brgy. City Heights Gensan, Marvin Bala, 37 anyos, residente sa Brgy. Kipalbig, Tampakan, South Cotabato ug si Rodolfo Semera, 46 anyos, residente sa Sitio Gala, Brgy. Bololmala, Tupi South Cotabato human nga nakapiyansa sa kasong libelo nga ilang giatubang.
Sumala pa ni Police Captain Joseph Villanueva, Hepe sa Tampakan PNP nga una ng nasikop ang tulo ka mga wanted person niadtong milabayng adlaw sa girentahan niining balay human gisilbihan ug warrant of arrest sa mga personahe sa maong estasyon.
Nasayran nga kasong libelo nga dunay criminal case no.12174-43 nga unang gi-isyu ni Presiding Judge Gerardo Braganza sa RTC Branch 43 nga pinetsahan pa niadtong Hulyo 6, 2020 ang unang giserve sa mga otoridad.
Saysay pa sa opisyal nga ang mga dinakpan pulos trabahante kini ilawom sa Lapanday Corporation nga nakabase sa Tampakan.
Nasayran nga una nang gidawat sa korte ang ilang gibayad nga piyansa hinungdan nga gilayon usab gi-release sa Tampakan PNP ang mga nasangpit.
Samtang nakuhaan usab ug pahayag sa DXMD-RMN Gensan team ang grupo ni Herbert Demos, ug sumala niini nga usa sa hinungdan nganong gikasuhan sila ug libelo gumikan dili matud pa madawat sa Presidente sa union ang ilang kapildihan sa gipahigayong Certification Election sa usa ka kompanya sa South Cotabato kung asa midaog matud pa ang ilahang gisuportahang grupo.
Dugang pa ni Demos nga maayo man ang ilang tumong sa gihimo nilang lakang nga kung sila ang mudaog kinahanglan ang kwarta sa union dili huptan sa miyembro sa union kundili ibutang kini sa bangko. (RV)
