Iligan City – Temporary nga ipasarado sa National Food Authority ang tulo ka mga bodega nga adunay gitagoan nga liboan ka sakong bugas, human kini gi-raid sa NFA ug sa National Bureau of Investigation kagahapon sa hapon.
Nakita sa mga sakop sa Task Force on Rice, nga gilangkuban sa NFA ug sa NBI, ang kapin kun kulang 20 ka sako’ng bugas sa duha ka tapad nga bodega nga gipanag-iyahan sa usa ka Sonia Payan nga taga- Cagayan de Oro City.
Wala si Payan dihang miabot ang mga utoridad.
Human ang pagsusi niini, gisunod ang laing bodega sa susamang barangay nga adunay gibana-banang 30 mil ka sakong bugas nga gitipigan.
Miingon si Abdul Jamal Dimaporo, hepe sa NBI- Iligan District Office, gipanag-iyahan kini sa usa ka Johnny Tan.
Si Virgilio Guimbao, trabahante sa bodega ni Payan miingon nga wala nila gitagoan ang maong mga bugas tungod kay niadtong Biyernes pa lang kini nahidangat gikan sa kauluhan.
Gibaligya kini nila matud pa sa ilang mga suki nga gikan pa sa nagkalain-laing dapit sa Mindanao sama sa Ipil sa Zamboanga Sibugay.
Apan miingon si Sambitory Dimaporo, provincial director sa NFA-Iligan City, Lanao del Norte, nga walay lisensiya ang nasangpit nga negosyo ug wala kini gideklara ngadto sa NFA busa kini nahimong illegal. (Divina Suson)
*Photos by Radyoman Ghiner Cabanday
