Mitahan balik sa maayong pamuyo ang tulo ka mga kanhi miyembro sa New People’s Army (NPA) lakip ang usa ka menor de edad ngadto sa Alfa Company 88 th Infantry Battalion didto sa Sitio Malantao, Barangay Halapitan, San Fernando, Bukidnon adtong milabayng Martes.
Gituohang miyembro sa HQ Loader Sub-Regional Committee 2 (SRC2) sa North Central Mindanao Regional Committee (NCMRC) ang mga mitahan nga bitbit ang use ka Carbine Rifle ug usa ka magazine lakip ang siyam ka mga live ammunitions.
Gumikan sa kakapuy ug kakulangan sa supply sa pagkaon maong mitahan ang mga kanhi miyembro sa NPA nga giilang sila Man Oloron alyas Bright, 56 anyos, iyang asawa nga si Nili Salobo alyas AYA, 55 anyos ug ilang 11 anyos nga anak alyas POWER.
Gisulti ni LTC Christian James P. Vingno, Commanding Officer sa 88IB nga ang padayong pagpahigayon sa Community Support Program (CSP) ug mga operasyon sa tropa sa militar maoy nahimong instrumento sa pagkabuwag sa mga grupo ug pagsurrender sa pipila ka mga miyembro sa NPA.
Mapasaligon si LTC Vingno nga padayon gihapon ilang pagpaningkamot aron nga mapupo ang problema sa insurhensiya.
