Hatagan ug dakung atensyon sa mga sakop sa kasundalohan ang tulo ka munisipyo sa lanao del norte kun asa adunay dakung hagit niining umaabot nga pinili-ay.
Hinungdan nga ubay-ubay sa pwersa sa kasundalohan ang ipang-deploy sa maong mga lugar tungod sa maong hagit nga posibleng makahimo ug kakuyaw alang sa mga botante.
Gibutyag ni Col. Alex Aduca, sa Task Force Pinili-ay nga ang maong mga lugar naglanggob sa munisipyo sa Pantar, Tagolo-an ug Salvador.
Matud ni Aduca nga dakung hagit kanila ang bangi sa mga politiko sa nasangpit nga mga lugar hinungdan nga gihatagan nila kini karon ug pagtagad.
Dili lang ang nasangpit nga mga munisipyo ang gihatagan karon ug pagtagad sa kasundalohan lakip ang tanang munisipyo sa lanao del norte ingon man mga barangay dinhi sa dakbayan sa iligan.
