Davao City – Pipila ka adlaw ayha ang eleksyon, nagpahimangno ang Commission on Election (COMELEC) nga dili na pwede ang pagpang-apod apod sa mga sample ballots sa mismong adlaw sa eleksyon o karong Mayo 13, 2019.
Gisaysay ni Atty. Krisna Samantha Caballero, ang tigpamaba sa COMELEC-XI, nga mamahimong ihatag ang sample ballots ayha pa man ang eleksyon basta dili lamang atol sa adlaw sa piniliay.
“They are no longer allowed to give it on the day of the election. Dili na sila pwede didto mag pwesto sa baba sa mga polling center or sa atong mga eskwelahan og didto ipang-apod apod sa ilang mga sample ballots. Dapat kanang mga sample ballots nila, ihatag na nila before hand,” saysay ni Caballero.
Gipaklaro ni Caballero nga hangtud karong Sabado na lamang, Mayo 11, 2019 ang katapusang adlaw sa pagpangampanya. Diin ang pagpang apod-apod og sample ballots sa Mayo 13, posibleng makonsidera nang usa ka illegal campaigning tungod sa pagpanghatag og election paraphernalia sa mismong adlaw sa piniliay.
“So kung naa na sila didto. Basin mahulog sila nga nag illegal campaign sila kay nanghatag pa man sila og election paraphernalia which is no longer allowed during that particular day,” matud niini.
Pahimangno sa COMELEC nga mamahimong mag-atubang og reklamo ang kinsa mang kandidato nga masakpang magbuhat niini basta aduna lamay reklamante kauban ang ebidensya batok sa pabadlong nga pulitiko. Kanunayng pahimangno sa katawhan labi na ang mga botante nga bantayan ang balota aron muresulta sa limpyo, way bias ug malampuson ang 2019 Midterm Election.
RadyoMaN Kirby Manzon
