Davao City – Mokabat sa 3 katawo ang natalang patay human nalumos sa sapa ug dagat atol sa pag obserba sa Semana Santa dinhi sa Davao Region.
Sa report sa Police Regional Office (PRO) XI, usa ang patay samtang duha ang samaran human nalumos sa dagat sa Kobo Beach Resort sa Kalapyahan, Barangay Dahican, Mati City, Davao Oriental kagahapong adlawa, adlawng Domingo.
Giila ang nalumos-patay nga si Carlo Lacida samtang ang mga samaran mao sila Ian Cadiente ug Jonel Maghoyop.
Nasayran nga naligo sa lalom nga bahin sa maong dagat ang mga biktima sa dihang gihapak sila og kusog nga balud.
Daling gidala sa Davao Oriental Provincial Medical Center ang mga biktima apan gideklarang dead on arrival ang usa kanila.
Samtang dinhi sa Davao City, duha ang natalang patay nga giila sa kapulisan nga si Bryan Loro Arevalo kinsa nalumos sa Cuaco Beach Resort dinhi sa syudad niadtong Biyernes Santo diin nasayran nga nakig-inom pa ang biktima ayha mitugsaw sa dagat samtang padayon pang ginaila ang usa pa ka nalumos sa Lipadas River, Barangay Bayabas Crossing, Toril niadtong adlawng Sabado.
Una ng nagpahimangno ang otoridad ngadto sa publiko nga magmaigmaton sa pagligo ug dagat o pool sa Semana Santa aron malikay sa pagkalumos.
RadyoMaN Renz Barbarona
