Davao del Sur- Patay ang tulo ka mga tawo apil ang usa ka tres anyos nga batang babaye samtang duha ang samaran sa dihang gibagnos sa usa ka oil tanker truck ang usa ka balay bandang alas 3:45 sa hapon atong adlawng Dominggo partikular sa may Brgy. Marbel Bansalan, Davao del Sur.
Sumala sa police regional office eleven, samtang kining oil tanker nga gimaneho ni Gerald Pulpul, hamtong ang pangidaron, residente sa Purok 22 Mintal ning siyudad.
Sa inisyal nga imbestigasyon, ang maong truck gikan sa Arakan, North Cotabato, padulong unta sa syudad sa Davao apan sa paglabang niini sa nahisgutang tulay sa maong lugar, gisulayan kini og brake sa maong driver ug wala damha ni baliwliw ang lubot sa maong sakyanan diretso sa pikas kalsada ug ni hapak ngadto sa usa ka balay sa mga biktima.
Patay nang niabot sa hospital sila si Kent Roxas, 17 anyos, nga residente sa may Bansalan Davao del Sur, Milagrosa Salod, 65 anyos, residente sa General Santos City ug si Aleah Marie Maini, tres anyos nga residente sa Brgy. Marber Bansalan Davao del Sur samtang padayon nang ginatambalan sa Viacruses Hospital sa may Bansalan ang duha pa ka mga angol sa maong insidente nga sila si Sophia Mainit, 7 anyos, ug Angel Erebias, 16 anyos, pulos taga Bansalan, Davao del Sur.
Samtang gitambalan usab ang driver sa maong tanker truck sa nahisgutang hospital.
RadyoMan Paul Canono
