Tungod sa indi pagbaton sang tanyag nga kasal sa babaye nga ginahigugma, caretaker nagkomitir sang suicide.

Nagkomitir sang suicide ang isa ka caretaker sa bahin sang Purok Sunflower-A, Brgy. Lampitak, Tampakan, South Cotabato sang tinalikdan nga adlaw.
Ginkilala ang nasambit nga persona kay J-R Lipe, 27-anyos, soltero, caretaker sang Gondad Farm sang nasambit nga lugar.
Naghikog ang nasambit nga persona paagi sa paghigot sang iya nga leog gamit ang isa ka lubid nga gin-angot sa balayan sang puluy-an nga iya ginaistaran.
Base sa ila nga imbestigasyon suno kay Police Senior Inspector Harold Cornel, Chief of Police sang Tampakan Pnp, pasado alas dyes sang aga sang Setyembre 26 subong nga tuig ang biktima ang nagbakal pa sang 4 ka metros nga lubid sa Gunday store kaupod ang katrabaho kag naghambal pa nga ang nasambit nga lubid ang manami suno pa nga gamiton sa paghikog nga nabatian naman ini sang tindera sang nasambit nga balaligyaan kag katrabaho sini.
Apang wala na ginsapak sang mga ini tungod daw nagalahog-lahog naman suno pa ang nasambit nga persona.
Nahibaluan nga alas nuebe sang gab-i nagpauli ang nasambit nga persona nga nakainom kag sang takna alas onse sang aga sang Setyembre 27 nasapwan na lamang sang iya nga kaupod sa trabaho si J-R nga nagabitay na sa sulod sang puluy-an.
Samtang base sa pahayag sang pamilya sang biktima nga indi lang man sang makaisa ka bes nga ginhimo ni J-R ang pagkomitir sang suicide umpisa sang napaslawan sa babaye nga iya gintanyagan sang kasal.