General Santos City—samad sa liog ug abaga ang naangkon sa usa ka 29 anyos nga lalaki human kining gitigbas gamit ang sanggot sa iyang ig-agaw sa may Barangay Butuan, Jose Abad Santos, Davao Occidental.
Ang biktima nailhang Marlon Aladad, 29, residenti sa maong barangay. Samtang ang suspek nailhang si Eden Bodiong, legal age, residenti gihapon sa barangay Butuan, Jose Abad Santos.
Alas 9:00 ang takna sa gabie kagahapong adlawa, March 6, 2017, dihang nag inum ang biktima uban sa iyang ig-agaw didto sa ilang lugar. Nalingaw ug kanta kanta sa Video-k ang nahisgutan apan pila ka minutos ang nakalabay, naglalis ang duruha tungod lang sa walay igong hinungdan.
Didto na mikuha ug sanggot ang suspek dayon gitigbas sa biktima igo sa liog ug abaga, paspas dayon nga misibat ang suspek sa wala sayring lugar samtang ang biktima gilayon nga gidala sa iyang mga kabanay sa balay tambalanan sa ilang lugar apan pila ka oras ang nakalabay, ila kining gidala sa Dr. Jorge Royeca hospital dinhi sa syudad sa General santos gumikan sa delikado niining kahimtang.
Sumala ni Manuel Aladad, amahan sa biktima nga wala gyud sila masayud unsay gilalisan sa iyang anak ug sa ilang paryenti nga misangko sa pagpaningbas.
Sa karon ginatun-an pa sa mga kabanay kung ilang pasakaan ug kaso ang suspetsado kansa padayong nag tago tago human sa krimen. Padayon pa usab ang gihimong imbistigasyon sa Jose Abad Santos Police Station kalabutan sa insidenti.
