General Santos City—samad sa nawong ang naangkon sa usa ka driver human kining gipusil sa gwardya sa Makar Warf, dinhi sa Dakbayan sa Gensan alas 10:45 ang takna sa buntag kagahapong adlawa, Enero 30, 2018.
Giila ang biktima nga si Robert Recla, 35, driver sa MRAY Container Yard ug residenti sa Olarte Vill., Barangay Labangal, Gensan.
Suspek sa pagpamusil giilang si Elizer Cablitas, 50, security guard nga nakabasi sa Makar Warf.
Sa inisyal nga imbistigasyon sa Police Station 2 nasuta nga nag park sa iyang gimanihuang sakyanan ang biktima dihang siya gisita sa suspek gumikan wala matarong ug parking ang iyang sakyanan.
Tungod niini naglalis ang duruha nga misangko sa pagpamusil. Paspas nga gidala sa pinakaduol nga ospital ang driver samtang ang gwardya buluntaryong misurender sa Police Station 2.
Sa karon padayon pa ang imbistigasyon kalabutan sa insidenti, samtang gihuwat pa sa kapulisan ang pamilya sa biktima alang sa pagpasang-at ug kaso batok sa suspek.
