Usa ka patayng lawas ang napalgan alas 6:30 ang takna sa buntag kagahapong adlawa diha sa may San Miguel Village Barangay Palao ning dakbayan sa Iligan.
Sumala sa kapulisan sa presento 5, naila kining si Julito Roman y Villaroman 54 anyos, minyo, usa ka worker sa usa ka electrical store ug molupyo sa may Abellanosa Residence sa susamang lugar.
Nadiskubrehan kini sa usa ka residente sa maong dapit nga anaa sa gawas nga bahin sa iyang gate ang maong patayng lawas.
Nakita sa lugar-hitabuan ang usa ka blade samtang sa dugang pag imbestigar sa kapulisan, nakita sa walang bahin sa iyang kamot ang usa ka samad nga gituohang gi unay niya ug laslas ang iyang kaugalingong pulso.
Problema sa pamilya ang gitan-aw nga motibo sa kapulisan labot sa maong panghitabo apan ila pang padayonon ang imbestigasyon kung wala ba’y foul play.
Sa blotter sa kapulisan, sukad niadtong Agosto 20, 2018, wala na kini mo report sa iyang trabaho ug nagsige na kini ug inom.
Kasamtangang gihaya karon ang patayng lawas sa biktima sa usa sa punerarya ning dakbayan sa Iligan. (Report ni RadyoMan Paul Elorde)
