General Santos City—Duha ka mga samad sa ulo ang naangkon sa biktimang si Rodrigo Labaja, 29 anyos nga taga Datal Bila, Malungon, Sarangani Province human kining gitigbas sa iyang magulang nga si Arnold Labaja, 40 anyos, residenti sa maong lugar gumikan sa selos alas 9:00 ang takna sa gabie.
Sumala sa report, nag inum ang biktima ug ang suspek didto sa ilang lugar dungan sa selebrasyon sa anibersaryo sa ilang barangay apan, dihang nangahubog na didto na nanggawas ang mga kalain ug buot sa magulang ngadto sa iyang manghod diin gitumbok niini nga siya nagduda nga may gusto matud pa ang biktima sa iyang asawa.
Kalit lang matud pang mikuha ug lagaraw ang suspek dayon gitigbas ang iyang manghod igo sa ulo nga bahin.
Paspas usab nga gidala sa ospital dinhi sa Gensan ang biktima ug kasamtangan na karon nga gipailawom sa medikasyon.
