Mataas ang turn-out sang enrollment sa rehiyon dose tungod sa pagtakop sang Hulyo 15 yara sa 92.34 porsyento sa pihak sang ginapangatubang nga pandemya. Samtang ginalauman nila suno kay Department of Education 12 Regional Director Allan Farnazo nga malampasan pa ang nagligad nga school year nga numero sang enrollee’s tungod nagapdayon pa man ang enrollment tubtob sa Agusto 24 kag wala pa nagsulod ang datos halin sa mga private schools.
Ginkumpirmar ni Dr. Farnazo nga ang rehiyon dose ang may pinakamataas nga turn-out sang enrollment sa bug-os nga pungsod kag padayon sini nga ginaawhag ang mga ginikanan nga ipaenrol ang mga kabataan ilabi na ang mga 4ps beneficiaries.
Samtang kon ang may-angot sa pagpangayo sang bond paper sang pipila ka mga manunudlo suno sa regional director istratehiya lang sang mga manunudlo kag wala man suno pa niya ini ginasugo nga mangayo.
Aminado man si Dr. Farnazo nga may pondo ang ahensya para sa learning materials apang wala nila nahibaluan kon makaigo sa mga galastuhan sa tunga sang ginapangatubang nga pandemya.
