Pagadian City – Gapaalim pa karon sa iyang mga samad ug bun-og sa lawas ang 22-anyos nga ulitawo human kining gikulata ug giluba sa wala mailang suspetsado alas 8:30 niadtong nakalabay nga gabii dihang dapita sa Cerilles St., kanto Salazar St., sakop sa Brgy. Santa Maria ning syudad sa Pagadian partikyular sa atubangan sa San Pedros Lechon Manok.
Giila ang biktima nga si Almer Nuevo alyas Mansor, residente sa lungsod sa Molave niining probinsya.
Sa inisyal nga imbestigasyon sa Pagadian City PNP nasayran nga samtang nangatang og pampasaheroang tricycle ang biktima human kining nikaon sa nahisgutang establisyemento uban ang 40 anyos nga negosyante nga nailang si Asya Cana, lumulupyo sa Brgy. Tarakan, Dinas, Zamboanga del Sur kalit matud pang nihunong sa ilang atubangan ang duha ka lalaki nga sakay sa motorsiklo.
Dali sumala pa nga ninaug sa single motor ang sakay nga lalaki og walay langan na nisuntok kang Almer ug dili pa igo gidungab pa kini sa makaupat nga higayon.
Nakahiagom sa duha ka samad nilubaan ang biktima sa iyang likod ug laing duha usab ka samad sa iyang too nga abaga.
Dali usab nga nisibat ang mga responsible human sa hitabo paingon sa wala matino nga lugar , blangko pa ang kapulisan sa syudad sa motibo sa maong insidente.
