Katipunan, ZDN-Hangtod karon halos dili kadawat ugIgo nalang sa pagpatulo sa ilang mga luha dala sa pagmahay ang gibati karon sa mga kabanay sa biktima sa dihang nakutloan sa hinulamang kinabuhi ang usa ka 23 anyos nga ulitawo human nakuryentehan.
Didto kini nahitabo sa may Brgy. Sinuyak, sakop sa lungsod sa Katipunan ning probinsya sa Zamboanga del norte niadtong miaging adlaw alas 8:00AM.
Ang biktima mao si Raymund Cambic, taga brgy. Miatan, Katipunan, ZDN, matod pa ang biktima nangisda kini gamit ang improvised nga kuryente sa isda 25 metros ang gitas-on ug gi konekta kurente nga 220volts ang gikusgon didto mismo sa panimalay ni Uldarico Moreno.
Ang biktima aksidenteng nakuryentehan sa iyang gigamit nga live wire samtang nangisda sa usa ka kanal sa ilang dapit.
Nakugang nalang ang igsuon sa biktima nga si Ruel Cambic sa dihang nakita niya ang iyang igsuon nga wala na naglihok ilawom sa tubig. Dako iyang pagtuo nga nakuryente kini.
Dali nga nangayo ug tabang ang magulang niini samtang iyang gihaw-as sa tubig ang lawas sa iyang manghod aron sulayan pag tabang apan ulahi na ang tanan.
Ang biktima nakaangkon ug sunog sa tuong bahin sa kamot ug sa walang bahin sa iyang dughan nga mao’y mitsa sa iyang wala damhang kamatayon
Sa pagkakaron anaa na gipahimutang sa ilang panimalay ang patayng lawas sa biktima.
