Roxas City, Capiz- Maga-resume na subong nga adlaw sang Lunes, Hulyo 2, 2018 ang voters registration sang Comelec.
Kapareho sang mga nakaligad, liwat nga ginpanugyanan ni Roxas City Election Officer Atty. Joemar Betita nga hingalitan sang publiko ang halos tatlo ka bulan nga registration nga gin-set sang Comelec antes ang pagtapos sini sa September 29, 2018.
Ginpanawagan man sini nga magparehistro na ang mga botante nga na-deactivate ang ila ngalan sa listahan bangod wala makaboto sa duha ka magkasunod nga eleksyon.
Samtang lakip sa pwede nga makaparehistro amo ang mga new registrants, mapa-change status, kag kasubong man ang mapa-transfer sang voting place.
Bukas man sila tagsa ka adlaw sang Sabado kag holiday kag nakahanda nga magbaton sang mga botante nga maga-parehistro kun sa diin nagalab-ot sa singko mil tubtob sais mil ka mga registrants ang ila ginalauman nga magaparehistro sa talatapan sang Comelec sa siyudad sang Roxas.
Hugot man nga ginpunto ni Betita nga wala sang extension sang voters registration.
Ginpabutyag dugang ni Roxas City Election Officer Atty. Joemar Betita nga wala ang mga ini nagabaton sang mga Barangay Clearance kag Barangay Certification halin sa mga maluyag magparehistro
Pinakamabakod suno sa iya nga dal-on sang mga ini amo ang IDs, proof of billing. Pwede man nga mag-upod sang persona nga pwede nga maka-attest ukon maka-testigo nga ikaw ang residente gid man sang isa ka lugar kun sa diin ikaw ang luyag nga magparehistro.
Samtang hugot sini nga ginpaandaman ang mga maluyag magpalista sang doble nga indi sa gihapon ang mga ini makalusot sa Comelec kag ang mas malala pa, ang mga ini ang posible nga makasuhan sa tion nga mapamatud-an.
