UN-Habitat magpatukod og mga permanenteng balay alang sa mga bakwit sa Marawi City

Human ang ground breaking niadtong Lunes, Oktubre 7, gisugdan na sa United Nations Human Settlements Programme o UN-Habitat ang pagtukod og mga permanenteng balay alang sa mga pamilya sa Marawi City nga kanhi nagpuyo sulod sa ground zero nga karon gitawag sa gobyerno og most affected area o MAA.

Partikular nga benepisyaryo sa UN-Habitat kadtong pamilya nga dili na makabalik sa ilang dapit sulod sa MAA tungod kay anaa kini sila sa 6-meter easement sa Agus River ug 20-meter reclamation area sa Lake Lanao.

Wala na gitugutan ang maong mga pamilya nga motukod og balik sa ilang mga balay nga naguba tungod sa giyera base na usab sa balaod sanglit deklarado naman kini nga ‘no build zone’ ug ‘danger zone’.


Adunay 1,900 ka mga pamilyang apektado niini apan 1,500 lamang ang hatagan sa UN-Habitat og mga balay.

Ang 400 ka pamilya, makadawat og susamang pabalay gikan sa San Miguel Foundation, matud pa ni Housing Secretary Eduardo Del Rosario, chairman sa Task Force Bangon Marawi.

Sa Barangay Kilala kung asa gihimo ang ground breaking niadtong Lunes, 500 ka mga balay ang tukuron sa UN-Habitat tungod kay ang sunod nga usa ka libo didto na tukuron sa ubang mga dapit nga paliton sa National Housing Authority o NHA.

Tukuron sulod sa 39 ka hektaryang yuta sa Barangay Kilala nga napalit sa NHA ang unang 500 ka mga balay nga adunay 90 square meters nga lote, concrete, single detached-one story structure nga adunay total floor area nga 46 square meters, adunay kasilya ug banyo, tulo ka kwarto ug ingon man husto nga electrical ug plumbing system.

Ang gobyerno sa Japan maoy mogasto sa maong proyekto sa UN-Habitat isip kabahin sa 500 million pesos nga gipirmahan tali ni Presidente Rodrigo Duterte ug Japan Prime Minister Shinzo Abe human sa ASEAN Summit niadtong nakalabay’ng tuig.

Facebook Comments