Un dia despues el parade y programa del Bureau of Fire Protection enconneccion con el Fire Prevention Month, cuantos caserias del maga trabahador del un bodega del un hardware el ya quema enantes aga na barrio de Camino Nuevo.
El incidente ya sosede banda antede man alas 10 del dia donde derepente ya lang ya arde el maga caserias locao na costao del corral de cement adentro del propiedad del un bodega del un hardware.
Asegun con Jovelyn Ligid, 21, casao, di quien marido trabahante del bodega, ta dorme adentro del diila casa su aca tres anac nombrao Noel Ligid, tiene edad de un mes cuando ya sale le afuera del diila casa.
Cuantos minuto el ya pasa ya mira si Jovelyn ta arde ya el diila casa donde ya precura pa le salva consu anac so Noel quien aquel tiempo dormido adentro.
Pero asegun con Jovelyn nohay mas le puede pa entra na casa porcausa del ardor del fuego donde cuantos parte del su cuerpo ya quema pa.
Porcausa deste, ya entabla ya lang pa afuera si Jovelyn dehando consu anac adentro del diila casa hasta ya man uput na fuego.
Despues ya puede controla con el fuego, maga bumbero ya puede encontra con el cadaver del bata.
Maga imbestigador del bumbero ta continua pa imbestiga para sabe cosa el causa del quema. ����
